Photo Credit - Addis Standard

እነ ጃዋር መሐመድ ጉዳያቸው በሌሉበት እንዲሰማ የተሰጠውን ብይን በመቃወም ባቀረቡት የይግባኝ አቤቱታ ላይ ዐቃቤ ሕግ መልስ ሰጠ

ታኅሣሥ 6፣ 2014 – ጃዋር መሐመድ፣ በቀለ ገርባ፣ ሀምዛ አዳነ እና ደጀኔ ጣፋ ጉዳያቸውን ለሚመለከተው ለፌደራል ከፍተኛ ፍርድ ቤት አንደኛ የፀረ ሽብርና ሕገ መንግሥታዊ ጉዳዮች በአስፈፃሚ አካላት እየታሰሩ በመሆኑ እኛም በራሳችን ፍቃድ ፍርድ ቤት አንቀርብም በማለት በጽሑፍ መልዕክት በመላክ በሦስት ቀጠሮ በችሎት ሳይቀርቡ መቅረታቸው ይታወሳል።

የሥር ፍርድ ቤቱም ችሎት በፍቃዳችን ሲሉ ያቀረቡትን ምክንያት በቂ አይደለም ሲል በሌሉበት ክሳቸው እንዲቀጥል ብይን ሰጥቶ ነበር። ሆኖም የተከሳሾች ጠበቆች የሥር ፍርድ ቤት የሰጠውን ብይን በመቃወም የይግባኝ አቤቱታ ለጠቅላይ ፍርድ ቤት 2ኛ ይግባኝ ሰሚ ችሎት አቅርበው ነበር።

ይግባኝ ሰሚ ችሎት ይግባኙን መርምሮ ያስቀርባል በማለት ዐቃቤ ሕግ መልስ እንዲሰጥበት ለዛሬ የቀጠረ ሲሆን፥ ዐቃቤ ሕግ መልሱን በጽሑፍ ዛሬ ለችሎቱ እና ለይግባኝ ባይ ጠበቆች ሰጥቷል።

በዚህ በዐቃቤ ሕግ መልስ በዋናነት ይግባኝ ባዮች ያቀረብነው ጥያቄ መልስ ካላገኘ ፍርድ ቤት አንቀርብም በማለታቸው ከቀጠሮ የቀሩበት ምክንያት በቂ አይደለም ተብሎ ከመታለፉ ጋር ተያይዞ የቀረበው ቅሬታን በተመለከተ፥ የይግባኝ ባዮች ምክንያት የፍርድ ቤት ሥልጣንና እና ነጻነትን የሚጋፋ ከመሆኑም በላይ ሕግን መሠረት ያላደረገ በማስረጃ ያልተደገፈ ነው ሲል አብራርቷል።

ከተከሰሱበት ድንጋጌ አንፃር የወንጀል ሥነ ስርዓት ሕግ አንቀፅ 160 እና ተከታዮች ድንጋጌዎች ዓላማ መንፈስ አንፃር ይግባኝ ባዮች እያወቁ ችሎት ለመቅረብ ፍቃደኛ ባለመሆናቸው መብታቸው ታልፈው በሌሉበት ክሱ በመሰማት ሒደት እንዲቀጥል መወሰኑ ሕግን መሰረት ያደረገ ውሳኔ ነው ሲል በምላሽ አብራርቷል። ይግባኝ አቤቱታቸው ውድቅ እንዲደረግም በምላሹ ጠይቋል።

ተከላካይ ጠበቆች በበኩላቸው በዐቃቤ ሕግ ምላሽ ላይ የመልስ መልስ እንስጥ ያሉ ሲሆን የፍርድ ቤቱ ከቀጠሮ በፊት ማቅረብ ትችላላችሁ ብሏል። ነገር ግን አራቱ ተከሳሾች በቀጣይ ቀጠሮ ፍርድ ቤት ቀርበው መከራከር ይፈልጋሉ ወይስ አይፈልጉም የሚለውን አቋማቸውን ይግባኝ ሰሚ ችሎቱ ለመረዳት እንደሚፈልግ መግለጹን ተከትሎ ጠበቆቻቸው ጥያቄውን ለተከሳሾቹ እንደሚያደርሱ አረጋግጠዋል። ይግባኝ ሰሚ ችሎቱም በይግባኝ ላይ ለማከራከር ለጥር 17ቀን 2014 ተለዋጭ ቀጠሮ ሰጥቷል።

Center for Advancement of Rights and Democracy (CARD)

Making Democracy the Only Rule of Game!

Leave a Reply

Your email address will not be published.